Mittarfik Vága floghavn
Mittarfiup allanngortinneqarnissaanut annertusarneqarnissaanullu tamakkiisumik siunnersuisussarsiorluni 2011-mi januarimi Vágar Floghavn unammisitsivoq. Suliffeqarfiit peqatigiit sisamat unamminermi peqataapput, peqatigiiffillu FAERPORT ajugaavoq. Junip 17.-ni FAERPORT Vágar Floghavnilu mittarfimmi sanaartornerup naatsorsorneqarnissaanut nuisinneqarnissaanullu isumaqatigiissut atsiorpaat. Mittarfiup nutaap isikkussaanut isumassarsiffiupput barakkit sorsunnersuup nalaani tuluit Savalimmiuni sanasaat. Barakkit qaliat qaarajuttoq nutarsarlugu atorneqarpoq, inersuarlu nunani tamalaani aallariartortarfinnut eqqaanarluni. Mittarfiup saniatigut illu kiffartuussiveqarfiusoq aamma sananeqarpoq, tassani Vága Floghavn, Atlantic Airways, Posta aamma TAKS allaffeqassapput, aammalu qatserisarfik aputaajaassuillu uninngasarfii tassaniissallutik.
Sanaartukkat illut katillugit 6600 m2-upput. Assit allat SNA-p Árni Winther Arkitektar-illu nittartagaanniipput. Nutaarsiassanit Dagur og Vika-mit ilanngutassiaq ataani takuuk.
Sanatitsisoq: Vága floghavn
Siunnersuisut: Peqatigiiffik FAERPORT (Árni Winther Arkitektar, Selmar Nielsen Arkitektur, LBF, SMJ Ingeniørit siunnersuisut, taakkununngalu ilanngullugu Cowi siunnersuisutut qanimut suleqatigineqarluni)
